Imajin … Di sekan mont a 2021 don deh ya! How yu di du wid eni Nyoo Yaaz rezalooshan weh yu maita mi mek? Eena dehnya taimz, wid di koroanavairos stil di daag wi, ih maita mi haad fi kip op wid eni gud intenshan yu mi set yu main tu. (Noh main seh dat eevn wen no koroanavairos mi deh rong, ih stil mi haad fi di kip op Nyoo Yaaz rezalooshan bai di taihn Febiweri kohn lang!)
Bot noh bada hat yu hed, er di beet op yuself if yu faal dong lang di way. Jos git op bak ahn kehr aan az bes yu kyan. Dat da fi mee advais, noh main seh mee miself di fain it haad fi fala mi oan advais! Laad … what a ting! Febiweri sopoaz fi bi di Lov Mont. Soh, Lov Mont deh ya, bot ih soh haad haad fi spred rong di lov sohntaihn!
Febiweri (n.) – February
Flowaz sel plenti eena Febiweri sayk a Valentainz Day.
Flowers sell well in February because of Valentine’s Day.
Mek wi si how disya Lov Mont wahn kehr ihself lang. Ahn noh mek wi frayd fi help lang di lov. Pahn tap, ges wat? Wi jos mait en op glad-fraitn widowtn wi eevn ekspek it. Maybi wi mait fain lov, er maybi wi don fain wi lov paadna ahn wi jos mek it stranga!
glad-fraitn (adj.) – pleaseantly surprised.
Di gyal ma ahn pa mi glad fraitn wen dehn si dat ih mi geh heel.
The girls’ parents were pleasantly surprised when they saw that she had been healed.
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl, eemayl: sudz142@gmail.com
Vizit: www.nationalkriolcouncil.org